بصراحة مش عارف ابتدى منين ؟؟؟ ولا ابتدى ازاى اصلا ؟؟
كنت قاعد فى وسط مجموعة من البسطاء لكونى واحد منهم وفجأة قام واحد منهم سألنى سؤال ...ايه يا استاذ انت شايف مصر ازاى بعد الانتخابات ؟؟ قلتله زى الفل - ده علشان انا متفائل شويتين - بس هو اصلا فيه انتخابات؟؟ وبدأ كل واحد فيهم يغمز ويلمز ويتمتم بالكلام وفجأة لقيت واحد بيقولى انت ناقصك ايه يعنى تعليم وبتتعلم ، وعيش بتاخده مدعم ، لبس وبتلاقى لبس ، مستشفى وموجود بدل الواحدة الف ، سكن وقاعد فى بيت مع اهلك تحت سقف واحد وشكلك هتكون تحت سقف واحد بعد شوية بس مع ناس تانية غير اهلك ، عاوز ايه تانى حرام عليكم سيبوا البلد فى حالها بقى وخلى الراجل يشوف شغله .....
طبع انا كنت مبسوط من كلامه علشان هيثير عندى شهوة الرد والتوضيح والاقناع ...المهم فضلنا نتكلم كلنا ونتناقش على موضوع الانتخابات وهل حد بيدخل اللجنة اصلا ولا لأ؟؟ وكام واحد فينا معاه بطاقة انتخابية ؟؟ وكل واحد فينا عاوز ايه من المرشحين سواء برلمان او رئاسة ؟؟
المهم قدرت احصر مشكلات بعينها وحطيتها على قائمة اهتماماتى وهى ...فيه ناس مش معاها بطاقة انتخابية ..وكمان فيه ناس عندها قناعة انى لو روحت عند اللجنة هتبهدل ...وفيه اللى مقتنع بالانتخابات اصلا ...لا وكمان فيه اللى عاوز ينتخب مرشح لو دفع له فلوس او شغله ابنه ...ده طبعا غير اللى بيقول ( اللى نعرفه احسن من اللى منعرفوش) ......وبدأ النقاش ينفتح ويؤتى ثماره وبدأت ومع احد اصدقائى الناشطين فى هذا المجال بتوضيح الرؤية للناس ومحاولة اقناعهم بأن مصر بلدنا كلنا ولازم كلنا نختار اللى ينفع بلدنا ويرخص الاسعار ويشغل الخريجين وبدأن نحصر اسماء الناس اللى مش ليهم بطاقة انتخابية علشان نساعدهم فى استخراجها وطبعا كان فيه صنفين تعبونا شوية على ما فهموا منهم اللى بياخد فلوس علشان يروح ويناضل من اجل التصويت ، ومنهم بتاع الكلمة ( اللى نعرفه احسن من اللى منعرفوش ) ولكن الحمد لله قدرنا نفهمهم ان دى شهادة حق وهنتحاسب عنها يوم القيامة ومفيش حاجة تستاهل ان ابيع بلدى ومستقبل اولادى علشان الفلوس ...أما بتاع الكلمة اياها فقدرنا نوصله فكرة اننا ممكن نجرب اللى منعرفوش علشان نعرفه وممكن يكون كويس ولو مش كويس نشيله ونجرب غيره ايه المشلكة يعنى ......طبعا الموضوع مش سهل بس لازم نكمل علشان كلنا فى مركب واحدة لازم الكل يفهم ...عمال وفلاحين ..نخبة وشعب... طلاب واطفال ....وكل ده ليه ...؟؟؟
علشــان خاطـــــرك يا مصـــر
ليست هناك تعليقات:
إرسال تعليق