كنت بتابع بترقب وحذر شديدين جلسة مناقشة قرار الرئيس بمد قانون الطوارىء ، وبدا قلبى ينفض وشفتاى تتمتم بدعاء تفريج الكروب والتضرع إلى الله فى داخلى بألا يسمح لهذه البلطجة أن تمر ، ولكن عندما صدر الحكم النهائى لمحكمة الظلم بالاستبداد عامين مع الطوارىء ، وهنا نزل الخبر علىّ كالصاعقة أو أشد مثل أى مواطن مصرى بسيط بيحب البلد دى وبيخاف عليها ونفسه يشوفها أحسن بلد فى العالم وطبعا اللى زيى كتير أوى ، ووقتها شعرت بضيق تنفس لأول مرة فى حياتى ومش قادر اقعد فى البيت ، وخرجت ومشيت بعيد وفيه حاجة واحدة بس فى دماغى : هل احنا نستحق كده ؟؟ ..مصر العظيمة بشعبها ...مصر المجيدة بتاريخها المشرف ...مصر هبة النيل ...هل فعلا الحفاظ على مياه النيل محتاج طوارىء بالمناسبة ؟؟ ليه كل ده ؟؟ والغريب إنى أحاول أقنع بنفسى بكلام المنافقين اللى وافقوا على القانون مش لاقى سبب واحد يخلينى اقتنع بهذا القانون سىء السمعة زى اللى موافقين عليه ،
29 سنة طوارىء ومعدل الجريمة فى زيادة .
29 سنة طوارىء وأعلى معدل انتهاك للحريات .
29 سنة طوارىء وأعلى نسبة تهريب مخدرات .
29 سنة طوارىء وأعلى نسبة بلطجة وتزوير .
29 سنة طوارىء محاكم استشنائية ظالمة وأحكام جائرة .
29 سنة طوارىء وأعلى معدل فساد حكومى شهدته مصر .
29 سنة طوارىء والرئيس هو الرئيس .
29 سنة طوارىء ولسه محتاجين طوارىء ؟؟
بس هل ممكن نقف بشدة وبقوة ضد هذا القانون الاجرامى والمستبد والغير شرعى ؟؟
ليست هناك تعليقات:
إرسال تعليق