لما كان شريان الحياه

كنا زمان بناخد فى المدرسة ان نهر النيل هو شريان الحياة بغض النظر عن ان مياهه اللى بتوصلنا فى البيوت ملوثة وغير صالحة او انها دخل عليها مياه الصرف الصحى ، ثم هو فى النهاية شريان الحياة ، وكان زمان برضه فيه حركة ملاحة جامدة جدا وبرضه انتهت ، وكمان اعرف ان دول المصب هى مصر والسودان ، كل ده تمام 

طب ايه المشكله بقى؟؟ :

المشكلة اننا دورنا انتهى فى المنطقة ومعدش لينا كرامة وطبعا اسرائيل عنصر اساسى فى الحوار ده ، يعنى ايه الكلام ده ؟

الكلام ده معناه ان اسرائيل عاوزة تسيطر على مياه النيل علشان تخنق مصر وتتحكم فى شعب مصر من خلال نقطة المياه ، بس هل احنا ساكتين ؟؟

طبعا من يوم ما ربنا ابتلانا بطقم الخارجية الموجود حاليا فى الوزارة وكل يوم احنا فى تدهور وفضيحة على المستوى الدولى ، بقينا كل اسبوع مصرى يتقتل فى دولة ما ، واحنا نخنق اخواننا المسلمين فى غزة ، والتصريحات العنترية هى السمة الغالبة فى هذا المشهد .

كل ده واسباب اخرى دفعت اربع دول من دول المنبع الى توقيع اتفاقية لإعادة توزيع مياه النيل فى عدم حضور مصر والسودان والدول هى (اوغندا وبروندى اثيوبيا وروندا ) ، طبعا فيه حاجة ورا الاتفاق ده ايه هية ؟ هتظهر قريب اوى.

المهم ان الاتفاق ده من الناحية القانونية لا يعنى شيئا لأن المفروض اللى يوقع على الاتفاق 6 دول من اجمالى عشرة اعضاء هم دول خوض النيل ، ولكن هذا الاتفاق من الناحية السياسية يعنى الكثير ويعنى ان هناك خطرا ما سيلحق بنا فى المستقبل القريب ، لذا على الحكومة المصرية ان تسلك الدبلوماسية الصحيحة فى التعامل مع هذا الملف وتفويت الفرصة على الصهاينة إذا اردنا فعلا الخروج من هذا المأزق .

السؤال اللى بيطح نفسه هل من المتوقع ان يتم التفريط فى نهر النيل زى ما فرطنا فى حاجات كتير اوى ؟

سؤال اعتقد محتاج اجابة متأنية بعد دراسة محايدة